PAGGAWAD NG HATOL BUKOD SA MGA IBINABA NG ALLAH
Kabilang sa kahilingan ng pananampalataya sa Allah at pagsamba sa Kanya ay ang pagpapakumbaba sa Kanyang kahatulan, pagtanggap ng wagas sa kalooban sa Kanyang batas, at pagsangguni sa Kanyang aklat (Quran) at sa Sunnah ng Kanyang Sugo (e) sa sandaling nagkaroon ng pagkasalungatan sa mga salita, mga saligan, pagtalu-talo, mga alituntunin na nauukol sa mga dugo, mga kayamanan at sa lahat ng uri ng mga karapatan. Samakatuwid, ang Allah ang Siyang Tagahatol at sa Kanya ang hatol, kaya nararapat sa mga tagapaghatol na magtakda ng hatol batay sa mga ibinaba ng Allah, at nararapat din sa mga may katungkulan na sumangguni sa pagtakda ng hatol sa mga ibinaba ng Allah sa Kanyang Aklat at sa Sunnah ng Kanyang Sugo (saw).
Sinabi ng Allah sa katungkulang nauukol sa mga may kapangyarihan: {Katotohanang ang Allah ay nag-uutos sa inyo na inyong ibalik ang mga ipinagkatiwalang bagay sa nagmamay-ari nito, at kapag kayo ay humatol sa pagitan ng mga tao, kayo ay humatol sa katarungan}. (Qur’an 4:58)
At sinabi pa ng Allah sa katungkulang nauukol sa may katungkulan: {O kayong nagsisampalataya! Sundin ninyo ang Allah at sundin ninyo ang Sugo (Muhammad) at sila na sa inyo ay may katungkulan. At kung kayo sa isa't isa ay nagkahidwaan sa isang bagay, isangguni ninyo ito sa Allah at sa Sugo (Muhammad), kung kayo nga ay naniniwala sa Allah at sa Huling Araw. Ito ang pinakamabuti at pinakamainam na pagsasanggunian}. (Qur’an 4:59)
At pagkatapos ay Kanyang ipinahayag na talagang hindi puwedeng magka-isa ang pananampalataya at ang pagsangguni sa pagtakda ng hatol sa mga hindi ibinaba ng Allah.
Sinabi ng Allah: {Hindi mo ba napagmamalas sila na nag-aangkin na sila (raw) ay naniniwala sa mga ibinaba sa iyo [O Muhammad] at sa mga ibinaba (na kapahayagan) nang una pa sa iyo, at sila ay nagnanais na ang maging tagapaghatol sa kanilang (mga pagkakahidwa) ay ang mga Taghut (mga kampon ni Satanas na humahatol bukod sa itinuturo ng Qur’an at Sunnah [mga kapahayagan ng Propeta]), samantalang lagi nang ipinag-uutos sa kanila na kanilang itakwil ito. Datapuwa't si Satanas ay naghahangad na sila ay mapaligaw nang malayo……Hindi! Bagkus Ako (Allah) ay nanunumpa sa iyong Panginoon na hindi magiging ganap ang kanilang pananampalataya hanggang hindi ka nila tinatangkilik bilang tagahatol sa lahat ng mga pagkakahidwa-hidwa sa pagitan nila, at pagkatapos ay wala silang matagpuan sa kanilang sarili na anumang pag-aalinlangan o paninikip ng dibdib sa iyong naging pasiya, at maluwag nilang tanggapin ang mga ito nang ganap}. (Qur’an 4:65)
Samakatuwid, ang Allah ay Kanyang itinanggi ng lubos na pagtanggi sa pamamagitan ng pagsumpa, ang kawalan ng pananampalataya ng sinumang hindi sumasangguni sa Sugo (saw) sa pagtakda ng hatol, hindi nasasapatan sa kanyang kahatulan, at hindi tumatalima sa kanya. Gayundin na Kanyang itinakda ang kawalang pananampalataya, kawalang katarungan at pagkasuwail ng mga may katungkulan na hindi nagtatakda ng hatol batay sa mga ibinaba ng Allah.
Sinabi ng Allah: {At sinuman ang hindi humatol ng ayon sa mga ibinaba ng Allah (na saligang batas), kung gayon sila yaong mga hindi sumasampalataya}. (Qur’an 5:44)
At sinabi pa Niya: {At sinuman ang hindi humatol ng ayon sa mga ibinaba ng Allah (na saligang batas), kung gayon sila yaong mga mapaggawa ng kamalian}. (Qur’an 5:45)
At sinabi pa Niya: {At sinuman ang hindi humatol ng ayon sa mga ibinaba ng Allah (na saligang batas), kung gayon sila yaong mga palasuway (sa Allah)}. (Qur’an 5:47)
Kaya, samakatuwid nararapat lamang na magtakda ng hatol batay sa mga ibinaba ng Allah, at sumangguni sa mga ito sa pagtakda ng hatol, sa lahat ng paksang pinagkakaroonan ng pagtalu-talo sa pagitan ng mga Pantas sa kanilang mga pansariling pagsisikap na salita; – kaya hindi tatanggapin ang isa man dito maliban sa kung ano ang siyang ayon sa naituro ng banal na Aklat (Qur'an) at ng Sunnah, nang walang kasamang pagkamping bulag sa isang doktrina o pagpanig sa isang Imam – sa mga pinagtatalunan ukol sa lahat ng mga karapatan, ni hindi sa mga personal na kalagayan lamang tulad ng nasa mga ibang bansa na umaanib sa Islam, datapuwa't ang Islam ay hindi nahahati.
Ang Allah ay nagsabi: {O kayong nagsisampalataya! Magsipasok kayo sa Islam nang lubusan (sa pamamagitan ng pagsunod sa lahat ng batas at alituntunin nito)}. (Qur’an 2:208)
At sinabi pa niya: {Bahagi lamang ba ng Aklat ang inyong pinaniniwalaan at ang iba ay inyong itinatakwil?}. (Qur’an 2:85)
At gayon din naman na kailangang sundin ang doktrina ng mga Imam, sa kondisyon na isasangguni muna ang mga salita nila sa Quran at sa Sunnah, at ang sumang-ayon sa Quran at sa Sunnah ay mapapanaligang panghawakan ito, datapuwat ang sumalungat sa dalawang ito, ito ay ibabalik sa kanya ng walang panatisismo o pagkiling, lalung-lalo na sa mga bagay na nauukol sa paniniwala. Sa katunayan ang mga Imam (kahabagan nawa sila ng Allah) ay ipinapangaral iyon – Iyan ang doktrina nilang lahat – kaya ang sinuman ang sumalungat doon ay hindi sumusunod sa kanila, kahit pa man ito ay iniaanib sa kanila.
Ito ang sinabi ng Allah: {Sila (mga Hudyo at Kristiyano) ay tumangkilik sa kanilang mga pantas (maalam sa relihiyon) at sa kanilang mga monghe (pari) bilang kanilang mga panginoon bukod pa sa Allah, at (tinangkilik din nila bilang kanilang Panginoon) ang Mesiyas (Hesus), ang anak ni Maryam (Maria)}. (Qur’an 9:31)
Ang talata na ito ay hindi lamang sa mga Kristiyano pinapatukuyan, bagkus nasasaklawan din nito ang lahat ng gumawa ng tulad ng kanilang ginagawa. Kaya ang sinuman ang sumasalungat sa anumang ipinag-uutos sa kanya ng Allah at ng Kanyang Sugo (saw). Na kanyang ihatol sa pagitan ng mga tao ang iba bukod sa mga ibinaba ng Allah, o hinangad iyon bilang pagsunod sa kanyang pinipithaya o nagugustuhan. Sa katunayan, tinanggal na niya ang silo ng Islam at ng pananampalataya mula sa kanyang leeg, at kung kanyang inangkin na siya ay mananampalataya.
Katotohanan, ang Allah ay ikinaila ang sinumang maghangad niyon at Kanyang pinabulaanan ang kanilang inaangking pananampalataya, batay sa napaloloob sa Kanyang sinabi: {kanilang inaangkin}. Tunay ngang Kanyang ikinaila ang kanilang pananampalataya dahil ang katagang (kanilang inaangkin), tanging ito’y sinasabi lamang kadalasan sa sinumang nag-aangkin ng isang pag-angkin na may pagsisinungaling dito, sa dahilang kanyang sinasalungat ang kahilingan nito, at ginagawa ang ikinakaila nito.
Mapatutunayan ito ayon sa Kanyang sinabi: {At sa katunayan, sila’y inutusan na itakwil nila ito}. (Qur’an 4:60)
At sa kadahilanan ding ang pagtanggi sa mga Thagut ay isa sa mga sa saligan ng Tawheed. Batay sa talatang nasasaad sa Surah Al-Baqarah (256). Kaya kapag hindi naipatupad ang saligan na ito, samakatuwid siya ay hindi nagpapatotoo sa kaisahan. Katiyakang ang Tawheed ang siyang saligan ng pananampalataya na sa pamamagitan nito’y napapabuti ang lahat ng mga gawain, bagkus nawawalan ng saysay ang mga ito kapag ito’y nawala rin.
Batay sa Kanyang sinabi: {Kaya't sinuman ang nagtakwil sa mga Taghut (mga huwad na diyus-diyosan) at sumampalataya sa Allah ay tunay na tumangan ng isang matibay na hawakan na kailanman ay hindi masisira}. (Qur’an 2:256)
Iyon ay dahil sa ang pagsangguni sa pagtakda ng hatol sa Thagut ay paniniwala sa kanya. Kaya’t ikinaila Niya ang pagkaroon ng pananampalataya sa sinumang hindi nagtatakda ng hatol batay sa mga ibinaba ng Allah, ito’y nagpapahiwatig lamang na ang pagtatakda ng hatol ng ayon sa batas ng Allah ay pananampalataya, paniniwala at pagsamba sa Allah na siyang nararapat na pananampalatayanan ng isang Muslim. Kaya hindi niya dapat ipanghusga ang batas ng Allah sa kadahilanan lamang na ang paghuhusga sa pamamagitan nito ay siyang pinakaangkop sa mga tao at pinakatumpak na magpalaganap ng katiwasayan. Sa kadahilanang ang ibang tao ay kanyang itinututok lamang ang kanyang pansin sa aspetong ito, at kanyang nakakalimutan ang unang aspeto. Samantalang tunay ngang pinintasan ng Allah ang sinumang naghuhusga sa batas ng Allah dahil lamang sa kanyang pansariling kapakanan ng walang kalakip na pagsamba sa Allah.
Sinabi ng Allah: {At kapag sila ay inaanyayahan sa Allah at sa Kanyang Sugo, upang humatol sa pagitan nila. Pagmasdan, ang isang pangkat sa lipon nila ay tumatanggi, datapuwa’t kung ang katuwiran ay nasa panig nila, sila ay (dagliang) lumalapit sa kanya nang kusang-loob at may pagtanggap}. (Qur’an 24:48-49)
Samakatuwid sila ay walang pinapahalagaan kundi tanging ang kanilang naiibigan lamang, kaya’t anumang sumasalungat sa kanilang naiibigan, daglian nilang nilalayuan ito, sa dahilang wala silang pagpapahalaga sa pagsamba sa Allah sa pagsangguni sa Kanyang Sugo (saw) para magtakda ng hatol.